Top

Atalik gabea

Umorea Azkaraten, Luze edo Motz

Araitz-Beteluko «Tximuutxe» Emakume Taldeak bi herrietako udalen babesarekin antolatuta, datorren martxoaren 3an arratsaldeko 19:30ean Azkarateko Kontzeju-Etxean Luze eta Motz umore emanaldia eskeiniko dute Idoia Torregarai Martijak eta Mirari Martiarena Iraolak.

Aurrez, «Bakean dagoena bakean utzi» proiektuan aritu ziren elkarrekin lanean eta haren hildoari jarraituz bertan ere landu zituzten ondorengo gaiei ekingo diote umoretik: hilekoa, menopausia, ligatzeko teknikak, sexua… barre eginez, zirikatuz.

— Luze edo Motz.
Eguna: 2023/03/03.
Ordua: 19:30.
Lekua: Azkarateko Kontzeju-Etxean.

Energia komunitatea martxan jartzeko lehen urratsak

Mendialdeko Mankomunitateak energia berriztagarrien inguruko hitzaldiak antolatu ditu pasa den udazken honetan Goizueta, Leitza, Araitz, Lekunberri eta Larraunen. Bertan azaldu dira energia berriztagarrien teknologiak eta hauen abantaila eta desabantailak, baita herritarrek norbanako gisa zein kolektibo gisa hartu ditzakeen neurriak trantsizio energetikoaren aurrean. Araizko Udaletxean emandako hitzaldiaren ondoren, gure bailaran ere interesa azaldu dute zenbait bizilagunek energia komunitate bat martxan jartzeko.

Hitzaldietan argi geratu da energia komunitate bat bertan bizi diren bizilagunek eratu behar dutela energiaren sektorean benetako aldaketa bat egotea nahi badugu.

Lehen bilera gabonen aurretik egin dute energia komunitatea sustatuko duen taldea eratzeko. Hemendik aurrera bilerak hilabetero egiteko asmoa azaldu dute eta dei egiten diete Araitz bailaran bizi diren bizilagun guztiei komunitatean parte hartzeko. Gaiaren inguruan informazio gehiago edo lagundu nahi duen inor izanez gero Udaletxetik pasa daiteke informazio eske.

Araizko Zaporeen azoka arrakastatsua

Pasa den igandean Araizko Zaporeak-en azoka arrakastatsua ospatu genuen Arribeko plazan. Antolatzaileak oso pozik agertu dira izandako erantzunarekin.

Beti bezala bailarako produktuei balioa ematea izan zuen xede nagusi azokak. Seigarren edizio honetarako gainera sagarra izan zen protagonista eta bertaratuek bailarako sei baserri ezberdinetan egindako sagardoak probatu ahal izan zituzten: Uztegiko Ieramendi; Intzako Antsonegoikoa, Oxenea eta Perunea; Arribeko Dendalborda eta Beteluko Poxtenea.

Horretaz gainera bertako gazta, esneki, ezti, ogi, berdura eta artisauek landutako produktuak ikusi, dastatu eta erosi ahal izan zituzten gerturatu zirenek. Goiza elizako arkpean egindako bazkari eder batekin amaitu zuten, bailarako arkume ederrarekin.

Nerea Mazkiaranen azokako argazkia

Mendialdeko aktibazio sozioekonomikorako plana

Hiruhileko honetan Mendialdea Eskualdea aurre egiten ari da bere Eskualdeko Aktibazio Sozioekonomikorako Planaren lanketaren azken zatiari.

Garapenerako ahalmen handiena duten 5 sektore ekonomikorekin lan egingo da: Elikadura osasuntsu eta jasangarria, energia berdearen industria, industria orokorrean, turismo jasangarria eta merkataritza eta ostalaritza.

Planaren diseinua parte hartze prozesu baten bidez egiten ari da, eskualdeko sektore ekonomiko ezberdinetako eragile nagusiekin 35 elkarrizketa eta 9 lan saio baino gehiago egin direlarik.

Planaren zirriborra eskualdeko biztanleekin alderatu nahi da foro irekian, urriaren 25ean Leitzako Herri Aretoan.