Top

Jakinarazpenak

2025 urteko karga-tasak

Araizko Udalak, 2024ko azaroaren 25ean egin bilkuran, ondoko erabakia onetsi zuen, Nafarroako Toki Ogasunei buruzko martxoaren 10eko 2/1995 Foru Legean ezarritakoari jarraikiz. Hona hemen testua osorik:

1. 2025. urteko karga-tasak.

1.1. Lurraren gaineko kontribuzioa: karga-tasa: %0,25.

1.2. Eraikuntza, instalazio eta obren gaineko zerga: karga-tasa: %3,5.

1.3. Jarduera ekonomikoen gaineko zerga: udalaren gutxieneko indizea; 1,13.

1.4. Hiri-lurren balio igoeraren gaineko zerga: lurraren balioaren gainean sortzapena egiteko unean aplikatu beharreko koefizienteak onestea, balio-gehikuntza sortzen den epearen arabera. Hain zuzen, 2/1995 Foru Legearen 175.2 artikuluan ezarritako gehieneko koefizienteak izanen dira. Karga-tasari dagokionez, balio-gehikuntzaren sortzealdi guztietan karga-tasa bakarra ezartzea: %20koa, alegia.

2. Erabaki honek 2025. urteko urtarrilaren 1ean hartuko du indarra.

3. Hau guztia jakinarazten dizut jakin dezazun, eta behar diren ondorioetarako, ohartaraziz erabaki horren kontra ondoko errekurtsoak jartzen ahal direla, hautara:

a) Berraztertzeko errekurtsoa, egintzaren organo egileari berari zuzendua, hilabeteko epean, iragarki hau Nafarroako Aldizkari Ofizialean argitaratu eta biharamunetik aitzina.

b) Administrazioarekiko auzi-errekurtsoa, Nafarroako Auzitegi Nagusiko Administrazioarekiko Auzien Sailari zuzendua, bi hilabeteko epean, iragarki hau Nafarroako Aldizkari Ofizialean argitaratu eta biharamunetik aitzina, edo

c) Gora jotzeko errekurtsoa, Nafarroako Administrazio Auzitegiari zuzendua, iragarki hau Nafarroako Aldizkari Ofizialean argitaratu eta hilabeteko epean.

Araitzen, 2024ko abenduaren 26an.–Alkatea, Jose Manuel Zubillaga Muguerza.

2025eko urtarrilaren 14ko Nafarroako Aldizkari Ofizialean argitaratua.

2024ko Jarduera Ekonomikoen gaineko Zerga

Honen bitartez, Araizko zergadunei jakinarazten zaie, 2024. JARDUERA EKONOMIKOEN GAINEKO ZERGA ordaintzeko epea abenduaren 30a arte izango dela.

Ordainketa helbideratuta baldin baduzue, epe horretan Bankutik kobratuko zaizue.

Araitzen, 2024ko azaroaren 29an.

Egoitza elektronikoan, 2024ko JEZren jatorrizko bandoa.

Kaleen izenak euskaratzea. Jendaurrean jartzea

Araizko Udalak, 2024ko irailaren 30ean egin osoko bilkuran, erabaki zuen Araizko udalerriko kaleen izenak euskaratzeko espedientea jendaurrean jartzea.

Honela bada, jendaurreko informaziorako hogei egun balioduneko epea irekitzen da, edozein pertsona fisiko edo juridikok espedientea azter dezan eta egoki iritzitako alegazio, iradokizun edo erreklamazioak egin ditzan.

Espedientea interesdunen eskura egonen da Araizko udaletxean eta udal honen egoitza elektronikoan: https://sedeelectronica.araitz.eus.

Araitzen, 2024ko urriaren 24an.–Alkatea, Jose Manuel Zubillaga Muguerza.

Jatorrizko iragarkia: Nafarroako Aldizkari Ofizialean.

Espedientea: Egoitza Elektronikoan.

2024ko kontribuzioak

Honen bitartez, Araizko zergadunei jakinarazten zaie, 2024ko KONTRIBUZIOAK 2024k azaroaren 30ean bukatuko dela.

Katastroko ondasunen zerrenda eduki nahi izanez gero, udaletxan dago eskuragai.

Ordainketa helbideratua balego, epe horretan bankutik kobratuko da.

Araitzen, 2024ko urriaren 30ean.

Egoitza elektronikoan, 2024ko kontribuzioen jatorrizko bandoa.

Araizko Zaporeak ferian parte hartzeko deialdia

Araizko Zaporeak eta Araizko Udala hemen gara bueltan berriro bailarako feriaren edizio berri batekin, eta antolatzen dugun zortzigarrena izango da. Harrapazan/k!

Urriaren 27an, hileko azken igandean, Arribeko plazan (egun euritsua balitz frontoiean) egingo dugun baserritar eta ekoizle ferian parte-hartzeko gonbidapena dakarkizuegu.

Bailaran bertan ditugun produktu osasungarriak, lurrarekin eta animaliekin erres­petuan ekoitziak, baserri eta etxeetatik plazara atera nahi ditugu; intxaurrak, azak, porruak, gaztak, yogourtak, gurina, taloak, mermeladak, ogia, ukenduak, saskiak, makilak, apaingarriak… etxean duzuena plazaratu!

Gure bailarako baserri eta etxeak goratu nahi ditugu, bertako jakinduria, aberas­tasuna plazaratu.

Laborari, artzain, etxekoandre, artista, langile… oraindik izena eman ez baduzu, urriaren 23a baino lehen bete ondorengo galdetegia eta jarriko gara zurekin harremanetan postu bat gordetzeko.

Izena eman

    Palestinaren aldeko adierazpen instituzionala

    2024ko otsailaren 26an Araizko Udaleko alkateak, honako adierazpen instituzional hau aurkeztu zuen eta bilkuran dauden guztien adostasunarekin onartu zen:

    1. Su-eten berehalakoa eta iraunkorra ezartzea, nazioarteak gainbegiratuta Gazako zerrendan.
    2. Gazako zerrendari blokeoa kentzea eta laguntza humanitarioa sartzen uztea.
    3. Palestinarren bizitza normala ahalbidetzen duten zerbitzu eta eskubide zibil eta laboralak berrezartzea.
    4. Israelekin armen eta baliabide militarren salerosketak etetea, biztanleria zibilaren kontra ez erabiltzeko.
    5. Palestinarren kontra burutzen ari diren gerra-krimenak eta gizateriaren aurkako krimenak salatzea, genozidio osatzen dutelako (Nazio Batuen Giza Eskubideetarako Goi Mandataria den Craig Mokhiber-en, definizioaren arabera). Era berean, preso dauden pertsonak eta errefuxiatu guztien itzulera eskatu.
    6. Israelek Palestinako Lurralde Okupatuetan daraman garbiketa etnikoaren eta Apartheid erregimenaren amaiera exijitzea. (Garbiketa etnikoa eta apartheida dira, HRW, Amnistia Internazionala eta NBEren txostenak erabiltzen dituzten beste termino batzuk, inguruko egoera zehazteko).
    7. Israeli eta Palestinari dagozkien NBEren ebazpenak zorrotz bete daitezela exijitzea, baita ere nazioarteko komunitatearen aldetik Palestinar Estatuaren aintzatespena.
    8. Israelek bere apartheid-politikekin, legez kanpoko koloniekin eta sarraskiekin jarraitzen duen bitartean, administrazio eskala guztietan harremanak etetea bultzatza, diplomatikoak eta lehentasunezko elkarte komertzial eta militarrekoak barne.

    «Helpbidea» plakak, etxe sakabanatuak lokalizatzeko

    Gutun honen bidez, gure herrietako baserriak izendatzeko eta kokatzeko, Araizko Udalak abiatu duen egitasmo baten berri eman nahi dizugu; HELPBIDEA izena du, eta Nafarroako Gobernuarekin elkarlanean garatu dugu.

    Helpbidea herri guneetatik kanpo dauden baserriak lokalizatzeko sistema bat da batez ere, baina baita herriguneetan daudenak ere. Baserriari zenbaki jakin bat ematen zaio denboran zehar aldatuko ez dena. Identifikatzaile hori plaka batean jartzen da baserrien kanpoko aldean. Nafarroako ipar-mendebaldeko herrietan, bereziki, erabiltzen da sistema hau, Nafarroan helbide bat aurkitzeko modurik azkarrena delako; larrialdiren bat izanez gero, 112 telefonora deitzean ere, eman daiteke.

    Araizko Udalak bailaran sakabanatuta dauden baserri guztietako plakak bideratu ditu, honako dirulaguntzaren bidez lagunduta: 2022ko ekainaren 23an, NAOn argitaratu zen 112/2022 Ebazpena, maiatzaren 18koa, Barne Saileko zuzendari nagusiarena, Nafarroako Udalentzako diru-laguntzen deialdia onartzen duena, 2022. urtean etxe sakabanatuak lokalizatzeko eta seinaleztatzeko jarduerak egin ditzaten.

    Gutun honekin batera, zure baserriari dagokion identifikatzaile eta izenarekin plaka bidaltzen dizugu, baserriaren kanpoko aldean jarri dezazun.

    Egitasmo honen inguruan zalantzarik baduzu edo argibiderik nahi baduzu udalarekin harremanetan jarri zaitez, 948513087 telefono zenbakian edo udala@araitz.eus posta helbide elektronikoan. Bulego ordutegian ere pasa zaitezke: goizeko 09:00etatik 11:30etara.

    Jaso agur bero bat.

    HELPBIDEA zerbitzua erabiliz etxe edo kokapen bat bilatu nahi baduzu edo bere HELPBIDEAko ID zenbakia, ondorengo botoia sakatuta Nafar Gobernuaren bilatzaile bidez egin dezakezu:

    Electra Salteak Araizko bailaran argindarra etengo du tarteka

    Arribetik Intzara doan erdi-tentsioko linea osoan ingurumen-hobekuntzak egiteko, hornidura etengo da:

    • Goizez, gutxi gorabehera, 9:00etatik 9:30era. Mozketak minutu batekoak izango dira, gutxi gorabehera.
    • Arratsaldez, aurreikustea zailagoa da, baina 15:00etatik 17:30eko tartean izango dira. Hauek ere minutu batekoak.

    Goizeko mozketak dira herri bakoitzeko argindar sorgailuak martxan jartzeko, lan egiten dugun bitartean herrietan argia egon dadin. Arratsaldekoak berriz argindarra berriro linean sartzeko izango dira.

    Mozketak Azkarate, Uztegi, Gaintza eta Intzako herritarrei eragingo die.

    Linearen luzera dela eta, beharrezkoa izango da mozketak egun batzuetan egitea. Intzari egun gehiagotan eragingo dio, linearen amaieran dagoelako, eta Azkarateri gutxiago, linean dagoen lehen herria delako.

    Lanak aurrera doazen einean informatzen jarraituko dugu.

    Lan istripuaren aurrean Araizko Udalaren adierazpen instituzionala

    Atzo, astelehena urtarrilak 15, Araitzen izandako lan-istripu baten ondorioz, Willian Alfaro Acuña langilea hil zen. Urtea hasi besterik ez eta dagoeneko laneko instripu ondoriozko laugarren heriotza izan da. Beste behin ere, arazo sozial handi baten aurrean gaudela erakusten digu.

    Araizko Udalak, hildakoaren familia, lagun, lankide eta gainerako gertukoei bere elkartasuna eta atsekabea adierazi nahi die. Era berean, lan istripuak behin betiko desagerrarazteko hartu beharreko neurriak har daitezen aldarrikatu eta nondik norakoak argi ditzan eskatzen dio Nafarroako Osasun Publikoaren eta Lan Osasunaren Institutuari.

    Araizko Udalak lan segurtasuna bermatu eta lan istripuak behin betiko desagerraraztea ezinbestekoa dela adierazi nahi du. Helburu hau lortzeko, behar-beharrezkoa da egungo lan osasun eta segurtasunean aurrerapauso nabarmenak ematea zein langile guztien, eta batik bat egoera bereziki zaurgarrian daudenen, Lan Arriskuen Prebentzioari buruzko Araudia zehatz-mehatz eta irmoki betearaztea.

    Hori guztia dela eta, Araizko Udalak deia luzatzen die eragile guztiei administrazioa, erakunde sindikalak eta patronalarekin batera lan arriskuen prebentzioaren aldeko praktika onen jarrera izan eta bultza dezaten. Gainera, Lan Arriskuen Prebentzioari buruzko Araudia hitzez hitz eta zehatz-mehatz betetzen ez dutenen eta lan eremuko osasun eta segurtasun neurriak betetzen ez dituztenen salaketa ere egiten du lan eremuko ikuskaritzan hobekuntzak eskatuz.

    Araizko Udalak, bestalde, lan istripu hau deitoratzeko helburua duten ekimen eta adierazpenekin bat egiten du.